Maenan bocah dulu
Buseh onoh bocah pada angkob-angkob bae kita kira pada manting belajar,kaga taunya lagi maen game,buka IG ama buka You tube di Hape lah pada khusyu bet romanah ampe baba lewat ongkoh aja kaga pada engeh, ampe babanya lewat depanah romanah kaga gegetun pisan .
Jaman dulu mah kita kalo mao maenan kudu nyari ide dan bikin sendiri karena jaman dulu mah apa ge bisa jadi maenan,nemu daon gadung kita sindik kita bikinin layangan,entuh layangan kita ulukin kaga naek-naek pisan,kudu dibawa ngebecir dulu entuh layangan baru ngelipir lah pake daon gadung kaga bisa muluk, maen sekola-kolaan pensilnya dari lidi bukunya dari daon pisang uplek bangat tuh bocah pada ampe pada lupa makan saking resepnya,entuh ge enyak udah gegerawakan bae sambil tulak pinggang entuh bocah baru pada mingser pulang makan.
Bikin wayang -wayangan dari daon nangka dan bikin golek-golekan dari daon singkong entuh bocah dulu mah pada cepet bisa di ajarin ama babanya,maen masak -masakan pake kulit kembang pisang di iris-iris ceritanya daging, maen nya di gubug-gubugan nyeng dibikin dari batang singkong di iket pake tali kulit kedebong pisang dan atepnya pake pelepahan daon pisang berasa indah beud jaman entuh mah.
Lah entuh kampret ama Lege di iketin tali di alung-alungin biar kabur, lah kabur tapi lucunya entuh kampret ama lege kabur bawa tali,biar bisa di tangkep lagi ama entuh bocah , bocah karang pasti udah kaga ada nyeng kenal ama nyeng namanya lege , lege jenis serangga nyeng suka nemplok di daon puun apa aja tapi kebanyakan nemplok di pu-un pisang, serangga nyeng tai nya kaya bedak bikin muka pada cemong putih kena entuh kotoran lege,kalo puun nya kita erag entuh lege pada manting merutug pada jatoh ke tanah,kalo kampret ngambilnya di bombok bambu ganjelan genteng,tinggal di rojok lobang nya entuh kampret pada kuar dari bombok lah tinggal nutup aja lobang nya pake plastik entuh kampret pada masuk ke kantong plastik,pada manting becuitan dah.
Nyeng paling seru entuh bocah pada maen nyari undur-undur di abu bawah kolong rumah,ngudek -ngudek sarang undur-undur nyeng kaya user-user …eh salah ngudek tai kucing ke comot,entuh undur-undur kalo kita taro di telapak tangan rasanya rada geli-geli gimana gitu bikin kita begidigan saking bikin gelinya.
Kalo kita ngomongin abu lah entuh bocah dulu pada seneng maen deprok di abu,nyeng paling konyol entuh bocah maen abu dimunjungin terus dibikin lobang pake sikut pas udah belobang entuh anak laki pada kencing disitu,bikin lobang jadi basah lah entuh pinggiran nya nyeng kaga basah dipocelin dikit-dikit bagen dah bau pesing ge tapi entuh bocah pada resep.
Tapi dari kekonyolan entuh bocah ternyata ada hasil karya, entuh abu nyeng sisa dipocelin jadi bebentuk mangkok …saking pinternya entuh bocah jaman dulu aer kencing aja bisa jadi maenan dan karya seni.😁😁😁
Betawi Punya cerita
